(1903) ¡Probe España!
Presínate Xuanín. Ansí decía
un vieyu cabo'l fuéu 'l otru día
á un neñu que los nueve non cuntaba
y que'l vieyu, amorosu, falagaba.
-Agora mientes fierve y cuez la cena
que lluego prebaremos si está güena,
llevantemos á Dios los corazones
y recemos dalgunes oraciones
pidiendo, queridín, al Poderosu
que vuelv' acá sos güeyos bondadosu,
á ist' aflixida España, al patriu suelu,
y de paz lu fartuque y de consuelu.
-Oiga, güelín; agora que s'acuerda
y antes que la memoria se me pierda
¿ye verdá lo que Pin de Rifaela
me falaba, viniendo de la escuela,
que España é nostra patria muy querida
por quien siempre debemos dar la vida?
-Y non una, niñín, si non mil vides
foren, si les tuvieres, ofrecides;
pos esto que al deber toca y rispeta,
ye, más que obligación, xosticia neta.
El nome de la Patria é tan sagrao
que non tien nada'l mundo comparao,
y aquel que la enxuriara, ten presente,
que será maldecíu eternamente.
Todo cuantu nos semos y podemos
lo debemos al pueblu en que nacemos
y primero, anxelín, te mate'l cielu
que disprecies xamás el patriu suelu.
Mas esto non l'olvides, prenda mía,
y ténlo bien presente n'aquel día
cuando, ya fechu 'n mozu y ya podieres,
te llame pa cumplir con tos deberes.
Riqueces, honra, vida, fuelgu, alientu,
sin importate nada, da contentu
por el bien de la Patria que apenáa
s'afaya, sin consuelu, disgraciáá.
-¿Pued' España llorar?
-¡Ay! Si mialma
que hoy, como nunca más, á la probina
aflixe per ú quier tan triste suerte
que sólo en mar de penes la convierte.
-Y teniendo con ella deber tantu,
que Pín de Rifaela llama santu,
¿cómo ansina, güelín? ¿No hay por ventura
remediu pa quitai tant' amargura?
-Si, criatura, si. Mas solamente
el Eterno Siñor y Onipotente
ye'l que puede mandanos de so manu
el aliviu y la paz pa'l pueblu hispanu.
Quien da gloria á los mesmos anxelinos
dexándolos á toos contentinos,
dí, si la patria mía tien en cuenta,
¿non la puée tamién poner contenta?
Mas si ye quien á fello fácilmente
á so bondá infinita homildemente
y con grande fervor hay que pedillo
pa poder dalgún día conseguillo.
Y con doble razón, pos ten por ciertu
que la causa de todo el desconciertu
que abluca á la nación ye que olvidamos
los preceutos de Dios y lu enxuriamos.
¡De todo el desconciertu!... ¿Bon testigu
non ye aquisti, niñín, d'un gran castigo
en que'l mesmu Siñor abandonáos
paez nos dexa en pagu á los pecáos?
Contra la voluntá contra 'l contentu
del que rixe la tierra y firmamentu
y arriba ente les nubes tien so tronu
¿viesti xamás facer algo de bonu?
Díme ¿hay sabios na tierra nin hay reyes
que nos puedan ditar miyores leyes
pa facenos felices, nisti suelu
que lo que tien escritu Dios del cielu?
¿Non diz en sos mandatos soberanos
que nun ye á engañase ni á engañanos?
Pos ansina, niñín, quien á Él ofende
los deberes de Patria desatiende;
y quiciáes con nostros desvaríos
escontra d'atopanos aflixíos
en probe rinconcín s'afay'agora
dimpués de ser del mundo la Siñora.
-¿España foi valiente?
-Sí, queridu:
ú quiera que só nome yera oidu
de mieu aterrecíen les naciones
cuidando esfarrapara sos pendones.
Tanta gloria xuntó que 'l orb' enteru
pasiaba so lleón valiente y fieru
como si fora dueño y hebo día
que 'n la so tierra 'l sol non se ponía.
Mas ¡ay! entóncenes ye... pero callo
que me pinguen los güeyos al pensallo.
En tiempos que na más en Dios confiáos
y na Virxen Santísima enfotáos
per el mundo triaben los sos fíos
tan famientos de glorias como bríos;
cuando ufanos llevaben per ú quiera
la insinia del Calvariu por bandera
y el nome del Siñor (sea benditu)
del combata mezclábase col gritu,
¡Viva 'l pueblu español! ú quier se oía,
¡viva! ¡viva! la xente repetía
colando el nome 'ntós de nostra España
desde 'l fondu del valle á la montaña.
Ay, si vieres, niñín, con qué amargura
recordando esos tiempos de ventura,
otru vieyu más vieyu que 'l presente
me decía, hoy, al vella tan doliente.
El resplandiente sol que un día lélu
quedó al mirar sos glories en Llepantu:
el blandu burbuyar del arroyuelu,
el paxarín qu' entama dulce cantu...
flores, valles, altures, mar y cielu
entonen de conciertu so quebrantu
y hasta 'l viento, selín, de la montaña
abaxa marmurando... ¡probe España!